Concurso de ideas sobre pesca responsable e mellora da xestión dos recursos pesqueiros.

PARTICIPANTES. Poden participar todos os pescadores, pescadoras, mariscadores e mariscadoras que teñan vinculación coa pesca artesanal galega (inclúe marisqueo a pé):

NIVEIS. Establécese unha única categoría. A participación será individual. Poderanse presentar ideas colectivas, aínda que a efectos de premio serán tratadas como individuais.

TEMÁTICA E EXTENSIÓN. A temática será a pesca responsable e a mellora da xestión de recursos pesqueiros. Os traballos poderanse presentar manuscritos ou por ordenador. Entregaranse en sobre pechado nas instalacións da Confraría de Bueu (Avda. Montero Ríos s/n, 36930 Bueu, Pontevedra). No sobre figurará o nome do autor e un teléfono de contacto, e levará "ASUNTO: CONCURSO BUEUINFORMA PESCA RESPONSABLE". No interior figurará a proposta e os datos persoais do autor.

PRAZO. O prazo de recepción das obras será ata as 20:00 horas do 31 de xullo de 2008.

PREMIOS. Establécense os seguintes premios:

Tres premios formados por material de seguridade e hixiene para a pesca profesional artesanal: Roupa de augas (pantalón e chaqueta), botas térmicas con punta de seguridade, chaleco salvavidas autoinflable e camiseta térmica. Os premios están valorados en 320 € cada lote.

O Xurado poderá conceder accésits ou menciones individuais e/ou colectivas. O fallo do xurado farase público no seminario final do proxecto, onde se procederá á entrega de premios.

XURADO. Establécese un único Xurado para a concesión dos premios. As súas decisións serán inapelables e estará composto polas seguintes persoas:

Catro representantes da Confraría de pescadores San Martiño de Bueu (ningún poderá participar no concurso). Invitarase a técnicos da Consellería de Pesca e Asuntos Marítimos.

Cada membro do xurado valorará do 1 (mínimo) ao 10 (máximo) cada traballo. Poderase usar como máximo un decimal na valoración. Os gañadores serán os que obteñan a maior puntuación media. En caso de empate o xurado decidirá en segunda votación o traballo gañador.

Na valoración teranse en conta aspectos como: orixinalidade, presentación e aplicabilidade da medida proposta

FALLO E ENTREGA DE PREMIOS. O acto de entrega dos premios celebrarase durante o seminario final do proxecto. O lugar e data concretarase nos próximos meses.

FINAL. A participación neste concurso implica a aceptación de todos os puntos contidos nas BASES da convocatoria. Os traballos presentados seguirán sendo propiedade dos seus autores. Unha copia dos mesmos entregarase á Consellería de Pesca e Asuntos Marítimos. Unha copia dixital, ou un resumo da mesma, será posta na páxina web do proxecto.

Calquera incidente coa convocatoria será resolto polo xurado.